Akademia e Shkencave dhe Arteve e Kosovës (ASHAK) ka reaguar ndaj debatit të djeshëm në Kuvendin e Kosovës ku, ndër tjera, u përmend edhe anëtarësimi i Josip Broz Titos, Sinan Hasanit dhe Rrahman Morinës në këtë akademi.

Ndonëse nuk e përmend me emër, ishte Kryeministri Hashim Thaçi ai që dje në debatin për gjendjen në UP në Kuvendin e Kosovës, përmendi anëtarësimin e Josip Broz Titos, Sinan Hasanit dhe Rrahman Morinës në ASHAK.

“Akademia e Shkencave dhe e Arteve të Kosovës sqaron se me presion ose pa të, Sinan Hasani dhe Josip Broz Tito janë zgjedhur anëtarë të ASHAK-ut në rrethana të caktuara të kohës, sikundër që Tito është shpallur doctor honoris causa në Universitetin e Prishtinës. ‘Kjo ka ndodhur dhe ndodhia nuk mund të anulohet”.

“Lidhur me disa zëra akuzues, që u dëgjuan në adresë të Akademisë së Shkencave dhe të Arteve të Kosovës në debatin për UP-në në Kuvendin e Kosovës më 6.02.2014, Shërbimi profesional i ASHAK-ut jep këtë sqarim për opinion:

” Nga dokumentacioni që posedon Akademia e Shkencave dhe e Arteve e Kosovës është e vërtetë se Sinan Hasani dhe Josip Broz Tito janë zgjedhur anëtarë të ASHAK-ut”.

“Sinan Hasani është zgjedhur anëtar korrespondent i Akademisë në vitin 1983 (i rregullt më 1986), me vizën që i ka dhënë atëherë Seksioni i Gjuhës, i Letërsisë dhe i Arteve, me propozimin dhe votimin e Rexhep Qosjes, së bashku me anëtarët e tjerë (Esad Mekuli, Vukashin Filipoviq, Idriz Ajeti dhe Muslim Mulliqi), dhe votimin në Kuvendin e Akademisë”.

“Josip Broz Tito është zgjedhur anëtar nderi i Akademisë më 26. 12. 1979 unanimisht, me aklamacion, madje në mbledhje që është mbajtur në Institutin Albanologjik (drejtor Rexhep Qosja), e ku merrnim pjesë edhe politikanët: Xh. Nimani, M. Bakalli, D. Ristić, M. Zvicer, B. Oruçi, M. Plakiqi, M. Mustafa. Para kësaj, në vitin 1975, Tito është shpallur doktor nderi i Universitetit të Prishtinës”.

“Rrahman Morina nuk është zgjedhur kurrë anëtar i Akademisë dhe nga dokumentacioni shihet se as që ka pasur ndonjëherë propozim për të”, thuhet në reagimin e e Akademisë së Shkencave dhe Arteve të Kosovës.