Flasin nga Qeveria: Në veri u dërgua policia e rendit, jo Njësia Speciale

Policia e Kosovës njoftoi për rritjen e prezencës policore në katër komunat në veri të Kosovës, të banuara me shumicë serbe. Mediat serbe në veri të Kosovës dhe ato në Serbi, raportuan se atje po dërgohen pjesëtarë të njësive speciale të Policisë së Kosovës. Por, zëdhënësi i Qeverisë së Kosovës, Përparim Kryeziu, hodhi poshtë këto…

Lajme

08/12/2022 22:48

Policia e Kosovës njoftoi për rritjen e prezencës policore në katër komunat në veri të Kosovës, të banuara me shumicë serbe.

Mediat serbe në veri të Kosovës dhe ato në Serbi, raportuan se atje po dërgohen pjesëtarë të njësive speciale të Policisë së Kosovës.

Por, zëdhënësi i Qeverisë së Kosovës, Përparim Kryeziu, hodhi poshtë këto pretendime.

“Bëhet fjala vetëm për policinë e rendit, jo për ndonjë njësi tjetër”, tha ai për Radion Evropa e Lirë.

Ministri i Punëve të Brendshme, Xhelal Sveçla, tha se rritja e prezencës policore ishte “e domosdoshme” pas incidenteve të fundit në këtë pjesë të vendit.

“Lusim të gjithë qytetarët të ruajnë qetësinë dhe të bashkëpunojnë me Policinë e Kosovës të cilët janë duke u angazhuar për rend dhe siguri për të gjithë qytetarët pa asnjë dallim”, shkroi ai në llogarinë e tij në rrjetin social Facebook.

Policia tha se ka rritur prezencën në Mitrovicë të Veriut, Zveçan, Zubin Potok dhe Leposaviq, pasi ka prioritet “ofrimin e sigurisë për të gjithë qytetarët”.

Nga pamjet e publikuara, disa policë janë parë në Lagjen e Boshnjakëve në Mitrovicë të Veriut. Ky është një vendbanim multietnik, ku jetojnë shqiptarët, serbët dhe boshnjakët.

Më 6 dhe 7 dhjetor, në komunat në veri të Kosovës ka pasur incidente me armë zjarri dhe me granata. Të martën, autoritetet bën të ditur se zyrat e komisioneve komunale zgjedhore u dëmtuan nga “mjete të rrezikshme”, nga grupe dhe persona “të maskuar”.