Real Madrid do të luajë pa të suspenduarin Cristiano Ronaldo në ballafaqim me Villarrealin të shtunën, por do të pres rikthimin e përforcimit më të shtrenjtë, Gareth Bale, që të kompensojë mungesën e portugezit.

Gara për kreun e tabelës në La Ligë është e nxehtë pasi Atletico Madrid udhëheq me 57 pikë, tri më tepër se Barcelona dhe Real Madrid .

Reali mposhti Atleticon 3:0 në duelin e parë gjysmëfinal të Copa del Rey të mërkurën por Bale nuk luajti. Trajneri Carlo Ancelotti ka deklaruar se ylli uellsian është rikuperuar nga lëndimi dhe është i gatshëm për lojë.

Bale pritet të paraqitet kundër Villarrealit, ndeshja e parë prej tri gjatë së cilave do të mungojë Ronaldo për shkak të suspendimit.

“Ai është në rregull por nuk e aktivizuam për shkak të kujdesit. Është në rregull, nuk ka pësuar ndonjë dëmtim të ri. Të shtunën nuk e kemi Cristianon por Bale është rikthyer dhe ky është lajm i mirë për ne”, deklaroi italiani.

Bale, 24-vjeç ka pësuar lëndime të shpeshta këtë edicion, i pari për të në Bernabeu pas transferimit në klub nga Tottenham për rekord 100 milionë euro.